Peqqissuseq aamma pinaveersaartitsineq

Kommunep inerisarneqarnissaani peqqissuuneq pinaveersaartitsinerlu pingaaruteqarluinnartut ilagaat. Ukiuni makkunani pinaveersaartitsinitsigut kingusinner usukkut aaqqiiniarnissaraluarput pisinnaajunnaarsissinnaavarput.


Kalaallit Nunaata kitaata avannaani timimik atuinngippallaarluni peqqinnanngitsumillu inooriaaseqarnerup kingunerisaanik kingunipiluit malunnaateqarluartumik atugaalerput.

Oqimaappallaarneq imaluunniit pualavallaarneq meeqqat inersimasullu akornanni takussaajartuinnarpoq inuiaqatigiinnullu tamanna ukiut tamaasa akisoorujusuusarluni. Pualavallaarneq inuttut inuunermut nalitoorujussuuvoq; inuunerup sinnerani nappaatinik kinguneqarpoq, soorlu uummatip taqarsuaatigut nappaateqalersitsisimalluni, sukkortunngortitsisimalluni kræftimillu nappaatit assigiinngitsut atugaalersimallutik.

Timip aalatinngippallaarneq aamma pualavallaarneq akiorniarlugit suliaqarfiit suliffeqarfiillu akimorlugit suleqatigiittoqartariaqarpoq; assigiinngitsut suliniaqatigiiffiit peqataa-tinneqartariaqarlutik – kommunep iluani sulisut namminersortunilu sulisut peqataasariaqarput. Kisitsisit tujorminartut allanngortinniassagutsigik kivitseqatigiittariaqarpugut.

Iluatsittumik suliniartoqassappat suleqatigiilluarnissaq tunngaviusariaqarpoq.

Qaasuitsup Kommuniata peqqissuuneq ima paasisarpaa; timikkut, tarnikkut aamma inuttut inuunermi ilorrisimaarneq. Peqqissuulluni inuuneq napparsimalluni peqataannginnermit allaanerulluinnarpoq.

Peqqissuuneq aamma pitsaasumik inuuneqarnermik imaqarpoq; ataatsimoortunut ilaaneq inuunerullu isumaqassusianik misiginermik imaqarami. Peqqissuuneq kisimi isiginiarneqassanngilaq, inuilli ataasiakkaat kingornussaannut, nukinginut, inooriaasianut, attaveqarfianut inuuniarnermini atugaanut il.il. atuumassuteqartutut isigineqassalluni.

Inooriaatsit ileqqullu meeraanermi siusissukkut tunngavilerneqartarput allanngortinnissaallu ajornakusoortarlutik. Taamaattumik meeqqat taakkulu angajoqqaavi maligassiusartuummata siusissukkut iliuuseqarfigissallugit pingaaruteqarpoq.

Meeqqat inuusuttullu amerlanertigut eqqissisimasumik navianartorsiorsinnaanermut peqqinanngitsullu pillugit isummertariaaseqarput; kingutigisuunissaq, nerisassat, pujortartarneq, imigassartortarneq, naamaartarneq hash-imillu misileraasarneq eqqarsaatigalugit. Meeqqat inuusuttullu isumaannik suliniuteqarnerujussuusariaqarneq taamaattumik pingaaruteqarpoq.

Taamatut suliniarnermi kommuneusimasut misilittagaat atorluartariaqarpavut; inuusuttunik maligassaqartitsilluni suliniuteqarneq atortariaqarparput.

Peqqinnarnerusunik nerisaqarneq timimillu aalatitsinerunissaq kommunep meeqqat inersimasullu inunngaannarlutik inooriaaseqarnerannik pualavallaarnerannillu akiuiniarnermini iliuuseqarfigisassai pingaarnerit marluk.

Nerisartakkavut suunersut samminerusariaqarparput; najugaqarfitsinni neriniartarfinni, pisiniarfeeqqani pisiniarfissuarnilu pisiassat peqqinnarnerusut nerisassanit qalapallanneqarsinnaasunit, chips-init, mamakujuttunit sodavand-inillu qanoq iliorluni pisiassatut kajungernarnerulersinneqarsinnaanersut eqqartornerusariaqarparput.

Tassunga ilaatillugu innuttaasut suliffeqarfinni, atuarfinni, suliffimminni, salami il.il. timiminnik aalatitsinerusinnaanerannik suliaqarnitsigut saqqumminerusariaqarpugut.

Illoqarfinni annerusuni najugaqarfinnut qanittuni nunaminertat pitsaasumik timimik aalatitsiviusinnaasut pigineqartariaqarput; soorlu pinnguartarfiit sammisaqartitsiviit; pinnguarfiusinnaasut, arsarfiusinnaasut aasakkut skateboard-erfiusinnaasut ukiukkullu kælkerfiusinnaasut sisorarfiusinnaasullu.

Nunaqarfinni pinnguartarfimmi nalunaaquttap akunnerpaaluini pinnguartoqarsinnaavoq timimillu aalatitsiviusiinnaalluni. Kommunemi illoqarfinni nunaqarfinnilu umiatsialiviit qimmiliviillu tikikkuminartuussapput pitsaasunillu atugassaqarfiussallutik. Tassami taakku pinngortitaliarnermi aqqutissanut inissiisarfiunertik pingaaruteqaatigimmassuk.

Najugaqarfinni peqatigiiffiit (arpattartoqatigiit, sisorartartoqatigiit, isikkamik arsaattartoqatigiit il.il.) peqqissuunermut pinaveersaartitsinermullu pingaaruteqartorujussuupput.

Innuttaasut kajumissusertik naapertorlugu kommunemi innuttaasunik peqqissuutitsiniarlutik suliniartorpassuit Qaasuitsup Kommuniata tapersersorusuppai.

Suleqatigiinnerunikkut minnerusunillu aaqqissuussanik pisoqartarneratigut; assersuutigalugu akissarsititsisarnikkut, kommunep innuttaasut peqatigiiffiilluamerlasuut allannguiniaqataasut erseqqinnerusumik saqqummersinniarsarerusuppai.

Ilulissani napparsimmavik

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 25-8-2017