Najugaqariaaseq aamma inissiat pitsaasut

Qaasuitsup Kommunia najugaqarfigiuminartoorusuppoq. Najugaqarnermut politikki atuuttoq inuutissarsiutit inerisarneqarnissaannut ilinniartitaanerullu inerisarneqarnissaanut tunngaviussaaq. Illoqarfiigut nunaqarfiigullu assigiinngitsorujussuupput assigiinngissitaarnerlu taanna kommunep iluani inerisaanermi atorluarneqassaaq. Taamaattumik illoqarfiit siunissami inerisarneqarnissaat pillugu isummertoqartariaqarpoq.


Qaasuitsup Kommuniani illoqarfiit nunaqarfiillu oqimaaqatigiittumik pilersaarusiorfigineqarnissaat nutaamillu eqqarsarluni inerisarneqarnissaat suli qulakkeerniarneqarpoq. Illoqarfiit nunaqarfiillu inerisarneqarnissaanni periarfissat piginnaasallu atorneqanngitsorpassuit pikkorfigiartorpavut takusinnaaleriartorlugillu.

Illoqarfiit nunaqarfiilluunniit ataasiakkaat immikkuullarissuseqarput aamma immikkorluinnaq ittumik ilisarnaateqarlutik taakkulu assigiinngiiaarneri siunissami inerisarneqassapput piujuartinneqassallutillu.

Qaasuitsup Kommuniani illoqarfiit nunaqarfiillu tamarmik taamaattumik immikkut ittumik nukittoqqutitik, ilisarnaatitik ataannarnissaminnullu tunngavitsik sulissutigissavaat. Maani sunarpiaruna pikkoriffigigipput? Siunissami taanna qanoriliorluta ineriartorsallugu iliuuseqassaagut?

Najugaqarfiit ataasiakkaat inerisarneqarnissaannik nalunaarsuinerup kingunerisaanik kommunalbestyrelse siunissami inuutissarsiutit inerisarneqarnissaannik, ilinniartitaanerit inerisarneqarnissaannik, kulturikkullu neqeroorutaasinnaasunik nutaanik assigiinngitsunillu il.il. pingaarnersiuinissaminut sakkussaqalissaaq.

Qaasuitsup Kommuniata innuttaasut ilaatikkusuppai kommunemi illoqarfiit nunaqarfiillu assigiinngissitaartuunerinik suliaqarneq qulakkeerusullugu.

Qaasuitsup Kommunia najoruminartoorusuppoq taamaattumillu pitsaasunik kajungernartunillu inissianik neqerooruteqarsinnaanini pingaartittorujussuullugu imaluunniit kommunemi najugaqarusuttunut sanaartorfissanik peqarusulluni.

Nammineq illorisamik sanaartornissaq inerisarniarlugu kajungernartunngorsarneqassaaq. Inissaaleqinerli akiorniarlugu kommunep inuttut atukkat aallaavigalugit inissialiorneq inerisarusuppaa pissakinnerusullu akikinnerusunik inissiani najugaqalersinneqarsinnaaneri neqeroorutigineqartalerniassammat sulissuteqarusulluni.

Inissiat tamrmiusut pitsaassusaannik qaffassaanissaq unammillernartorujussuuvoq kommunellu inissiaataasa amerlasuut tamanna pisariaqartippaat. Kommunep illoqarfiini nunaqarfiinilu inissiaqarpoq najugaqarfigissallugit tulluutinngivissunik.

Ilinniarneq ilinniartitaanerlu kommunemit pingaartinneqarluinnartuupput taamaattumik inuusuttut ilinniarnerminni inissiai – ilinniartut inaat – immikkut illuinnartumik malunnaavigineqarput. Ilinniartut inaat pitsaasut inuusuttorpassuarnut ukiut tamaasa kommunep suliffeqarfiutaanni ilinniarfiutigisuni ilaanni ilinniartoorusuttartunut atugassat malunnaateqarluinnartumik amigaatigivagut.

Inissiat ukiuni makkunani qanoq ittuussanerinik piumasaqaatit sakkortusigaluttuinnarput. Inuiaqatigiit inerisarneqarput, inooriaaserput allanngoriartorpoq pisariaqartitat nutaat inooriaatsillu erseqqinnerusumik atugaaleraluttuinnarput. Assersuutissat arlaqarput; kisimiillutik inissiami najugaqarusuttut arlallit, utoqqaat sivisunerusumik angerlarsimaffimminni najugaqarusuttut, aappariit avissimasut aappakuminnik meeraqarfillit aapparilikkaminnillu meerartaaqqissimasut arlallit il.il.

Inissiat amerlanerit assigiinngiiaartut siunissami neqeroorutigisinnaaneri pikkoriffiginerusariaqarparput – inissiat angissusaat, piginnittooriaatsit tikikkuminartuuneq eqqarsaatigalugit. Assigiiaartunik kipparissuinnarnik sanaartorneq atorunnaartariaqarparput assigiinngiiaassuserlu pilersillugu.

Pitsaassuseq siunissami aningaasaliiffigissallugu sapiisertariaqarpugut. Nutaanik sanaartornermi aaqqissuusseqqinnernilu imminut akilersinnaasunik suliaqartarnissaq eqqarsaatiginerusariaqarparput taamaalillutalu inissiaatigut siunissami pitsaassuseqarnissaat qulakkeerlugu. Inissiat nukinnik atuineri kommunemi nukinnik atuinernut tamarmiusunut malunnaateqarluinnartuusarpoq. Nammineq iliuuseqarnikkut aningaasatigut iluanaartoqarsinnaalluarpoq.

Kalaallit Nunaanni nunamik piginnittoqarneq ajornera immikkuullarissuuvoq. Tamatumami illoqarfitsinni nunaqarfitsinnilu illut isikkuinik ilusilersuinissaq ilisarnaasersuinissarlu immikkuullarissumik atugassaqartippaa. Assersuutigalugu illoqarfimmi illut akornisigut akornuteqarani pisuttoqarsinnaasarpoq. Tamanna immikkut illuinnartumik ilisarnaataavoq illulioriaaserlu taanna piujuartariaqarpoq illoqarfittanunaqarfittalu siunissami ilusilersornerani. Qimmit, umiatsiat qalipaatigissaartorpassuillu aamma inissaqartinneqartariaqarput.

Inissiaatitta ilusilersornerisa pitsaassusaat avatangiisinillu killilersuineq eqqartorneqartariaqarpoq pingaartinnerusariaqarlunilu. Illu avatangiisiminut qanoq sunniisarpa? Immikkuullarissuseq pigeriigarput eqqaamasariaqarparput aammalu illut sanaartukkallu avatangiisaasa pitsaassuseqarluarnissaat anguniarlugu.

Kalaallit sanaartortariaasiat ileqquilu nutaanik nutaaliaasunillu sanaartornermi ataqqineqartariaqarputtaaq. Nutaanngitsut nutaallu oqimaaqatigiisinneqartariaqarput.

Illut ataasikkaat inissiap kajungernartuuneranut imaluunniit kajungernartuunnginneranut kisimi pingaaruteqassanngilaq. Inissiap avatangiisai annerusumik minnerusumilluunniit pingaaruteqartarput. Assersuutigalugu inissiap eqqaani pinnguartarfeqarpa? Isikkivia kajungernaqutaava? Pisiniarfimmut qaninnermut ungasippa? Illup iluani iluaqusersuutit silamilu aneerasaartarfiit ima pitsaatigippat eqqaamiorisat naapisimaartarnissaannut isikkivimmillu takorannersumik isiginnaaqatiginissaannut?

Qaasuitsup Kommuniata illut silataanniittussatut siunissami kissaatigisat kajungernartuunngortinnissaat anguniassallugu suleqataarusuppoq; innuttaasut ilaatinneratigut asiariartarfinnillu pilersitsinissamik suliaqarnermi.

Qimussertarfik

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 25-8-2017