Kulturi aamma kinaassuseq

Inuit inuunerminni timimikkut anersaakkullu piginnaaneqarniarlutik, inuujuaannarniarlutik ineriartorniarlutillu takorluukkatik pilersitserusuttarnertillu ataatsimoorfigalugit nukissaqartarput. Inuttut inuunissaq inissaqartarpoq.

Siulitta ilisimasaat inooriaasiallu atorlugit inuit ersittumik atukkat qanoq ikkaluartulluunniit kulturikkut uummaarititsinissaminnut sakkortuumik immikkuullarissumillu pilersitsisarput; nalliuttorsiutiginnittarnermikkut, ileqqumikkut aamma nuannaallaqqinnermikkut. Inuit katerisimaarneri, illarneri nuannaarnerilu inuit immikkuullarissuullutik ilisarnaatigaat.

Kalaallit Nunaata kitaata avannaani kulturi pingaartinneqartorujussuuvoq kalaallillu oqaasii qitiutillugit sakkortuumik uummaarissumillu kulturikkut inuuneqarneq ilisimaneqaatigaarput. Ileqqoq malillugu assassornermiit aamma Qaanaami sanaartukkaniit Aasianni nunarsuarmi avannarpasinnerpaamik NIPIAA-p rockfestivaliani kalaallisut oqalulluni nipilersukkanut nutaaliaasunut ilisimaneqaatigilluinnarpavut.

Kulturi ataatsimuulersitsisarpoq katersuuffiusarlunilu. Isikkamik arsaalluni unammiuaarnerit, rockfestival, qimussimik sukkaniunneq imaluunniit kaffillerneq pineqaraluarpataluunniit ataatsimoorluta kulturerput kinaassuserpullu tassuuna ersertarpoq.

Qaasuitsup Kommuniata kulturi pingaartittorujussuuvaa; kulturi, kulturikkut misigisat suliallu, neqeroorutigineqartarnerisigut kommunep assigiinngiiaartumik uummaarissuunissaa aamma kissaatigalugu.

Qaasuitsup Kommuniani uummaarissumik peqatigiiffiit suliaqartarput, taakkulu siunissami alliartornissaat kissaatigaarput.

Peqatigiiffiit pitsaasunik atugaqartariaqarput katersortarfiillu nutaamik eqqarsaasersorfigisariaqarput nutarterneqarlutillu. Naapittarfiit pilersaasut pilersinneqassapput. Illut akornanni naapittarfiit kisimiiffiusinnaasut kiisalu tamat ornittagaat angisuut taavalu sanaartukkat timersornermut inissaqartitsisut timersornermillu ingerlatsiviusinnaasut. Naapittarfinnik pitsaasunik pilersitsisoqassaaq. Taakku mikisuusinnaapput illut akornanniillutik aamma angisuujusinnaapput tamanit tikinneqarsinnaasuni aamma timersornermut timimillu atuisinnaanermut atortulersuutinik ilaqarsinnaallutik.

Qimusserneq Kalaallit Nunaata kitaata avannaani pingaaruteqarluinnartuuvoq. Silap allanngoriartornera qimussertartut ikilinerannik kinguneqarpoq, taamaattorli aalisartut piniartullu qimusserlutik ingerlaartuarput taannalu kinaasutsitta ilagilluinnarpaa piujuartissallugu eriagisariaqartoq.

Kommunep isorartunerujussuuata kingunerisaanik kommunemi sumiorpaluuterpassuit naammattugassaatippai. Oqaatsinik pisuussuteqarneq taanna sumiorpaluutillu assigiinngiiaarneri kommunep siunissami nukittorsarusuppai piujuarnissaannillu suliniuteqarusulluni.

Inuiaqatigiinnut nuuttut immikkut kalaallit oqaasiinik ilinniartinneqarnissaat Qaasuitsup Kommuniata aamma kissaatigaa.

Kulturi oqaatsinik akunnattoorfeqarani sunniuttarpoq nunat killeqarfii naalagaaffiillu killingi akimorlugit aamma sunniuteqartarluni. Kulturitta immikkut sammineratigut ikinnguteqalernissaq kulturinillu takornartanik allanik naammattuuinissaq angusinnaavarput. Qaasuitsup Kommuniata nunat tamat nutaamik suleqatigilernissaannut kulturip atorluarnerusariaqarsoraa nunarsuarmimi periarfissanik ammaasuusinnaalluarmat.

Kaffisoriartortut

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 25-8-2017