Pilersaarusioriaaseq 2017-imoortoq

Pilersaarusioriaatsimut tunngassuteqartoq politikkikkut sulinermi sakkussaavoq, kommunimi siunissaq eqqarsaatigalugu pilersaarusiornermi illoqarfimmi immikkoortortat pilersaarusiorfineqarnerannut takussutissiisussaq. Pilersaarusioriaatsimut tunngassuteqartup Qaasuitsup Kommuniani kommunimut pilersaarut 2014-16-imoortup sulissutigalugu ingerlateqqinnissaa tunngavissittussaavaa, taamatuttaarlu immikkoortukkuutaanut pilersaarutit politikkertaasalu pingaartillugit ilusilersorneqarnissaannut tunngavissiisussaallutik.

Pilersaarusioriaaseq 2017-imoortumi suli eqqummaariffigalugit suliarineqarput sulissutigisassatut siunerfiit qulit, pingaarnersiuilluni suliaqarnermi toqqammavittut atorneqartussat:

  • Inuussutissarsiutinik ineriartortitsineq
  • Ilinniartitaaneq
  • Kulturi kinaassuserlu
  • Toqqissisimaneq inuunerissaarnerlu
  • Peqqinneq pitsaaliuinerlu
  • Silaannaq, avatangiisit kiisalu pinngortitaq
  • Kulturikkut kingornussat kissalu pigiinnarnissaat
  • IT, tamat oqartussaaqataanerat kiisalu oqaloqatigiinneq

Sulissutigisassat ataani allaaserisami takuneqarsinnaaput.

Pilersaarusioriatsimi 2017-imoortumi nutaami pimoorullugit sulissutiginiakkanut tunngassuteqartut attatiinnarneqarput, taamaattorli makkununnga naleqqussarneqassallutik:

  • Kommuni ataatsimut tamaat isigalugu takornariartitsinerup inerisarneqarnera aallunneqarnissaa.
  • Ilulissani mittarfiup tallineqarnissaa eqqarsaatigalugu attaveqaatinut tunngassuteqartut ineriartortinneqarnissaasa aallunneqarnissaat kiisalu kommuni ataatsimut tamaat isigalugu attaveqaatit patajaallisarneqarnissaat.
  • Illoqarfiup immikkoortortaanik nutaanik pilersitsinikkut Ilulissat illoqarfiata inerisarneqarnissaata ineriartortinneqarnissaatalu aallunneqarnera.
  • Inuussutissarsiutit annertunerusumik aallunneqarsinnaaqqullugit nunaminertanik suli atorneqanngitsunik inuussutissarsiornermi atorneqartussanngorlugit innersuussinerit kiisalu aalisarnermik inuussutissarsiuteqarnerup patajaallisarneqarnera.

Kommunalbestyrelsimi ilaasortat Pilersaarusioriaaseq atorlugu kommunip suliassanut tunngassuteqartunut sinaakkusersuissapput kiisalu suliassat suunerinut tikkuussisuusassallutik. Pilersaarusioriaaseq iluaqutigalugu anguniakkat ineriartortitsinermullu tunngassuteqartut ataqatigiissunngortinniarneqarput. Periuseq atorneqarsinnaassaaq aamma kommunip pilersaarutaanik ineriartortitseqqiinissamik periarfissiissalluni.

Kommunip pilersaarutaa pillugu paasissutissiisuusumik aalajangiineq pillugu aalajangerneq

Kommunimi ineriartornerup aamma periusissiap atuuttup nalilersorneqarneri peqqutigalugit kommunip pilersaarutaa ilaannakortumik aaqqissuussinertut aaqqissuuteqqinneqassasoq kommunalbestyrelsi aalajangerpoq.

Kommunalbestyrelsi naliliivoq, pilersaarusiornermut tunngassuteqartutigut unammillernartut kommunimut pilersaarutaasup ataatsimoorussap 2014-imi akuersissutigineqarnerata kingornatigut allannguuteqangaarsimanngitsut kiisalu pilersaarusioriaatsit aamma ineriartortitsinermi anguniakkat pilersaarummi takuneqarsinnaasut sapinngisaq tamakkerlugu attatiinnarneqassapput. Taamaattoq kommunip pilersaarutaani illoqarfiit nunaqarfiillu pillugit allaaserisat arlallit, immikkoortortat killingi kiisalu aalajangersagartaat naqqissorneqartussaassapput.

Naleqartitanut aamma periusissiamut tunngaviusut, periusissiaq 2020 sioqqullugu oqallinnermut sukumiisuusumut atatillugu pilersinneqartut, ingerlateqqinnissaat pisariaqartinneqarpoq. Taakku maannakkut suliniutinik aalajangersimasunik kinguneqartussanngorput.

Periusissiaq aamma suleqatigiinnissamut isumaqatigiissut tunngavigalugit, suliassaqarfiit aallussiffiusussat arlaqartut pilersaarusiorluni sulinissami ilanngunneqartussat saqqumilaartinneqarput ingerlaavartumillu kommunip pilersaarutaanut nutarterinermut ilanngunneqartassallutik. Suliassaqarfiit aallussiffiusussat, pilersaarusiornermut tunngassuteqartuni suliniutit aalajangersimasut suut siunissaq eqqarsaatigalugu aallartinneqassanersut tikkuuppaat.

Attaveqaatit kiisalu mittarfiit

Aqqusernit kiissalu angallannermut tunngassuetqartut immikkoortukkaarlugit suliarineqarnerat, kiisalu nunaannarmi qamutit motoorillit atorlugit angallannermut ileqqoreqqusaq kommunimut pilersaarutaasup nutarterneqarnissaanut toqqammavittut atorneqassapput. Attaveqaatinut atortuutit ineriartortinneqarnissaannut pilersaarummik pineqartumut tunngassuteqartumik suliaqarnissaq pisariaqartussaavoq.

Inatsisartut 2015-imi ukiakkut ataatsimiinneranni tunngaviusumik aalajangiunneqarpoq, timmisartorsuarnut angisuunut Ilulissani mittarfiliortoqassasoq, tamatumatumalu kingunerisaanik mittarfissarsuup sananissaanut pilersitsinissamullu tunngassuteqartut suliarineqarnissaat pisariaqalersimpput, taamatuttaarlu misissueqqaarnerit ingerlanneqartariaqalersimapput kiisalu Kangaatsiami, Qasigiannguani Qeqertarsuarmilu mittarfissat sanaartorneqarnissaat aamma pilersaarusiorneqartariaqalersimallutik. 

Nuuaarsuup eqqaa kiisalu Ilulissat mittarfiullu akornanni nunaminertat, mittarfiup allineqarnissaa taamatuttaarlu.

Kangerluarsuup avannaatungaa ataatsimut tamaasa isigalugit pilersaarusiorlugit aallartinneqareerput. Pilersaarutaasup ataatsimoortup illoqarfiup immikkoortortaannut sammivilimmik pilersaarusiorneq pisariaqartitallu tunngavigalugit attaveqaatinut tunngassuteqartunut pilersaarusiorneq erseqqissisittussaavaa. Pilersaarutaasup ataatsimoortup suliassanik aalajangersimasunik sammivilinnik pilersaarusiorluni suliaqarnikkut illoqarfimmi immikkoortortap ilaata inerisarneqarnissaa erseqqissitittussaavaa tamatumani aamma pineqarput attaveqaatinut tunngassuteqartutigut pisariaqartitat.

IT-qarneq, tamat oqartussaaqataanerat oqaloqatigiissinnaanerlu iliuuseqarfissatut ikorferniarlugit, kommunep pilersaarutaani Teknikkikkut sanaartukkat attaveqaatinullu naliginnaasumik aalajangersaaffiginerat nutarsarneqassaaq, taamaasilluni radioqarfiit sakkortusaavii imaatigullu kabelip ilaatinneqalissallutik. Aalajangersagaq kommunep pilersaarutaani nutarterneqassaaq ima: ”Susassaqarfinnut ilaapput attaveqaatitut sanaartukkat annertuut soorlu mittarfiit, heliportit, umiarsualiviit, aqquserngit annertuut, sulluliarsuit, silaannakkoortaatitut ikaarutit, raadiup sakkortusaavii, imaatigut kabeli illutai teknikkimoortut ilanngullugit, tankeqarfiit ass.”

Inuussutissarsiutit pingaarnerit marluk

Ilulissat Kalaallit Nunaanni illoqarfiuvoq takornariartitsinermut tunngassuteqartutigut siuttuusoq takornariartitsinerlu aningaasaqarniarnermut annertuurujussuarmik iluaqusiisarpoq. Aaliarnerli inuussutissarsiutit suli pingaarnersarivaat uagutsinnullu inuuniutaalluni. Tamanna siunissaq eqqarsaatigalugu annertunerujussuarmik qulakkeerniarneqartariaqarpoq.

Suliffeqarfitsigut ilusilersugaanerup ilisarnaqutigaa suliffeqarfeerarpassuanik peqarnera amerlanngitsunik sulisullit - tamanna atuupppoq aalisarnermi aamma takornariartitsinermi.

Siunissaq ungasinnerusoq eqqarsaatigalug suliffeqarfinnut patajaattunik pilerinartunillu sinaakkusersuinissaq pisariaqarpoq. Piffissami pilersaarusiorfiusumi kingullermi sinaakkutit pitsaasut qulakkeerniarlugit annertuumik suliniuteqartoqarsimavoq, ilaatigut aalisakkerivinnut aamma takornariartitsinermik suliniutinik, soorlu Kangiata illorsuartut qitiusoqarfissaanik aamma Ilimanani eriagisassanik aamma takornariartitsinikkut suliniutit aamma Qeqertarsuarmi sisorartarfissamik pileraarusiornikkut.

Piffissami aggersumi pitsaasunik sinaakkuteqarluni atugassaqartitaanissap aallunneqarnissaa suli pisariaqartinneqartussaavoq, ingammik inuussutissarsiutit pingaarnerit marluk eqqarsaatigalugit, soorunalimi inuussutissarsiutit allat aamma tamatumani pineqarput. Suliassat pingaarnerit ilagisussavaat Ilulissat mittarfiata allineqarnerata kingunerisaanik takorniartitsinerup inerisarneqarnissaanut periarfissat qularnaarneqarnissaat.

Illoqarfiup qanoq issusia kiisalu meeqqanut inissaqartitsineq

Takussutissiatut allaaserisat kiisalu innuttaasut nutsertarnerisa ersersippaat illoqarfiup immikkoortortaasa inerisarneqarnissaannut pilersaarusiornissaq pisariaqartoq – ingammik illoqarfinni annerusuni.

Piffissami aggersumi inissiatigut neqeroorutigisinnaasat amerlanerullutillu assigiinngiiaartuunissaat eqqummaariffigisariaqarpoq – tamatumani pineqarlutik inissiat angissusii, illumik piginnittuunerit qanoq ittuunissai kiisalu sumiinnissai – taamaaliornikkut pitsaassuseq periarfissaginnerunerlu pilersikkumallugit.

Pilersaarusiorfiusussami aggersumi illoqarfiup qanoq isikkoqarnissaa, uninngaarfigisinnaasat, sanaartorfiunngitsussat eqqummaariffigisariaqarput, tamatumani aamma pineqarput nunaminertat illuliornermi atugassiissutigineqartussat qanoq ittuunissaasa isummersorfigineqarnissaat, meeqqanut naammattumik periarfissaqartitsinissaq eqqarsaatiginerullu, aamma matumani qulakkeersumallugu illoqarfiup qanoq issusissaanut tunngassuteqartut Kiisalu illoqarfiit nunaqarfiillu akornanni uninngaarfiusinnaasut imminnut ataqatigiissuunissaasa qulakkeerneqarnissaat

Immikkoortortamut aalajangersimasumut pilersaarummik suliaqarnermi, sanaartorfiunngittussatut kiisalu sukisaarsaarfiusinnaasut pillugit suliaqarnermi kommunimut pilersaarutaasup nutarternissaa tunngavigalugu suliat ingerlanneqassapput, taamaaliornikkut sumiiffigisami najugaqarfiit pilersaarusiorfigineqarnerannut pitsaasumik tamatigoortumillu suliaqarnissaq qulakkeerniarneqarpoq.

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 25-8-2017